今日係10月10日，左丁山讀中小學時，今日就會返到學校與同學齊集廣場，立正睇升旗禮，跟老人家唱「三民主義、吾黨所宗……」因教育司署（嗰陣時嘅叫法）唔准是日放假，仍要上堂，中文老師、歷史老師同是一人，內地大學畢業生，流亡逃難來港，因資格不獲教育司署承認，屈在私立學校教書，薪水比羅師葛師畢業生差好遠（所以我地學校老師全是學歷特佳嘅不合資格教師，佢地學識與閱歷其實好過年青羅師葛師畢業生呢類合資格教師）。呢位文史老師在10月10日講課例牌講辛亥革命，有時講到流眼淚，更不忘大駡「朱毛」，或許有此原因，左丁山從未做過左仔。入大學後，發覺好多官中學生思想傾左，鍾情馬列，佩服老毛，大概係官中不准老師講政治，港大畢業嘅老師亦不懂中國政治，所以教出嚟嘅學生好易受左派思想影響，鍾意認中關社，胸懷革命大志，與左丁山呢類右派私立學校畢業生完全不同思想面貌。
眨吓眼過咗幾十年，呢晚在大學宴會上，貿易L捉住一位學生代表問：「我係老學聯，做過學聯報編輯，當年我地認中關社，保衞釣魚台，在維園俾洋警司打。我地好愛國，點解你地依家咁反中亂港？」學生代表見到大師兄咁講，一時之間愕晒然，之後如何對話，左丁山就唔清楚咯。貿易L來自津貼中學，入大學後稍為左傾，但與國粹派之狂熱相差甚遠，估唔到做貿易發達後，仍然咁好火氣，要「教訓」掛上黃絲帶嘅21世紀學聯師弟。
呢樣就係世代鴻溝（generational divide），幾十年前受港英統治、教育嘅人依家十分「愛國」，成為建制派，但當今大學生出生於上世紀九十年代，黃之鋒出生於香港回歸之前，佢地對「保衞釣魚台」、「認中關社」、港英洋警暴力等等，根本全無印象，佢地今日之思想，係與17年來嘅特區政府教育有關係嘅，與上一代以至啲80後，完全唔同，貿易L等同路人，可以鬧，但絕不能說服今日之學聯成員。建制派成日講：「港英從來唔俾香港人民主，今日香港比港英時期更多民主，你地仲嘈乜嘢？」呢樣係實情，左丁山同意，但建制派以此駁斥學生之民主訴求，就犯上邏輯錯誤，過往冇，唔等於將來唔可以有，Y世代人物更不知、不理會昔日港英如何如何，總之係要爭取今天和明日香港民主，若不明白這點，香港以後世代對抗不絕。