最近大家下畫四點鐘開電視，唔再係睇《放學ICU》喇，好多人都會轉台去新聞台，睇香港警察為大家做嘅特備節目——「警方及消防處就示威活動招開記者會」，即係向大眾「匯報」佔領行動為香港帶嚟啲乜嘢不便嘅記者會囉。
嗱，好好睇o架，主打嘅四點鐘警察公共關係科總警司許鎮德，一定會就佔領事件講幾分鐘，話集會點樣非法、學生阻住地球轉呀之類，又會講吓咩行業嘅生計受影響咁，仲次次都一定有英文版，將啲港式英語逐個逐個音咁彈出嚟。
交通總部高級警司李國忠呢，就會同大家睇Power Point，上面有晒地圖，話俾大家聽邊條路有擠塞，當然都係話因為佔中嘅緣故啦！
最後出場嘅係副消防總長（總部）梁偉雄，佢就係咁將啲救護車嘅數據拋出嚟，講吓有冇救護車遲咗到達救護現場。有遲嘅，都係因為佔中囉...
三位阿Sir家陣喺網上勁紅，位位都有個朵。分別係「4點鐘許Sir」、「李sir馬路的事」、「梁Sir數據王」，仲各自有fan page！許Sir嗰個有成一萬人like，都唔好話唔威！
Fan page仲好互動，好似許Sir嗰個會喺惡搞學聯Lester同Alex嘅fb page「捍衛lester alex佔領巫山HeHe團」留言：「雖然同你哋處於對立立場，但都希望你哋保重身體，或者我再重申雖然同你哋處於對立立場，但都希望你哋保重身體。」
《四點鐘許Sir》今去到呢度先，聽日再會！！