畀更多國家聯賽冠軍參加歐聯外圍賽，增加歐國盃決賽周球隊，到全個歐洲一齊搞歐國盃，歐洲足協主席柏天尼呢啲政策都係希望更多小國可以參與大賽，瓜分呢嚿肥豬肉。柏天尼益啲歐洲小國，都係為選民服務，因為大部份投票選主席嘅，都係小國足總。
每個歐洲足總都有一票，可以選出歐洲足協主席，強如西班牙、英格蘭足總只係得一票，頹至直布羅陀、聖馬力諾都係有一票。喺歐洲，小國比大國多，而且大國足總有人有錢有影響力，想𠱁佢哋都好難。但小國唔同，畀少少甜頭佢就會支持你。如果我係柏天尼，梗係專注為小國足總服務啦。柏天尼識咁做，係因為佢摸得清遊戲規則。
柏天尼（圖）點解識咁做？應該係佢嘅宿敵白禮達教曉佢。柏天尼一直都想爭做國際足協主席，但一直都唔成功，點解？因為白禮達早知道「得小國為王」嘅道理，只要得到亞、非、拉嘅支持，白禮達理得你歐洲！明知輸硬，柏天尼早前都決定唔入閘爭國際足協主席。
遊戲規則決定利益分配，無論係足協主席，定係一個國家嘅話事人都冇分別。權力來源自邊度，你自然會識得向咩人效忠。大家諗吓香港特首嘅權力來源，就可以解釋佢做嘅嘢。如果想搵出一個為人民服務嘅特首，最簡單就由遊戲規則着手：真普選。
文：咖喱