建制派大玩封殺，全面侵佔立法會各個委員會嘅正副主席位，不過投票時用暗票，自然難防有建制派唔想焗住撐，唔畀票自己友！噚日選人力事務委員會主席嗰陣，工聯會黃國健攞到12票，大幅拋離得4票嘅民主黨單仲偕；點知輪到選副主席，同係建制派嘅民建聯元秋蔣麗芸（圖），卻只得番10票，建制派另外嗰2票，落入對手單仲偕身上，令佢由4票變6票，算係輸咗個位、贏番少少面子咁啦！
而噚日衞生事務委員會選主席嗰陣，元秋一度想加入建制派戰團，鬧爆人力陳偉業唔好再玩程序，當時主持會議嘅梁家騮，聽到元秋把聲即刻唉聲嘆氣，似乎好怕有人添煩添亂。