喺中國南寧進行緊嘅世界體操錦標賽，早幾日已經玩晒團體賽，各項個人項目陸續展開，噚日就上演咗男子個人全能決賽。日本全能王內村航平（圖），毫無懸念下輕鬆贏出，實現5連冠霸業；而背負中國搶金牌希望嘅鄧書弟，就只能夠令一眾主場觀眾失望喇。
25歲嘅內村航平喺第一個項目自由體操已經攞到15.766超高分，由頭帶到落尾；即使一班歐洲好手來勢洶洶，呢位日本全能王亦未驚過，玩晒6項之後總成績91.965分，壓住英國嘅韋洛克同日本同胞田中佑典攞冠軍。
媽咪女友到場撐石仔
另外，今日剛好係香港石偉雄嘅23歲生日，真係恭喜佢！石仔近年都喺世錦賽中度過生日，問佢嘅生日願望時，佢話之前嘅仁川亞運跳馬金牌已經係最好嘅生日禮物，至於想唔想攞埋世錦賽面獎牌，佢就話：「順其自然啦！」石仔後日（12號）就會出戰世錦賽跳馬決賽，當日媽咪同女友Lo都會喺廣西捧場，真係warm到爆啦。
識睇，一定係睇足英台【英波Live】：
http://soccer.appledaily.com
http://bit.ly/engballlive