拍動作片系列有個指定大方向，就係主角越嚟越勁同叠馬，敵人亦會同時「升呢」平衡吓，咁先可以不停打落去，續集再續集。你睇《復仇者聯盟》，又Iron Man又雷神夠勁喇掛？點知壞人學689咁，向外太空吹雞班馬，打到班主角一仆一碌。
好喇，嚟到《變種特攻：未來同盟戰》，正傳加前傳加狼人外傳，咁多集照計乜都打到厭啦，點知電影公司玩高科技，一堆金屬敵人可以克制唔同嘅X-MEN弱點嚟打，兼且識得自我修復，搞到未來50年後，X-MEN近乎被滅絕咁滯。咁點算？編劇唔理咁多，索性玩到最大，整條時間穿梭橋出嚟，等過去同未來嘅X-MEN友大集合，搞到有兩個Professor X同兩個磁力王同場合作。
電影上畫之後，就被戲迷瘋狂喪插編劇亂咁嚟。龍叔叔對X-MEN歷史同世界觀冇乜堅持，最緊要打得燦爛，而且前傳《變種特攻：異能第一戰》拍得極好，對飾演年輕版Professsor X嘅James McAvoy，同年輕磁力王Michael Fassbender勁有好感，今次佢哋再度登場，仲有靈鳥同雷射眼翻生，見返一班熟識人物，人多勢眾，肯定睇得更過癮。玩時空橋好處係任你吹，總好過《英雄本色III夕陽之歌》咁，整個Mark哥孖生細佬掛？
主要演員熟口熟面，新𠴱幾個X-MEN又冇乜特色，極其量淨係得范冰冰算吸引。雖然范爺出場唔多，又着得過度密實，不過佢嘅特異功能係空間轉移，可以開個窿畀人去任何地方。套戲一開波第一幕戰事，就睇到范爺有幾厲害，視覺上亦表達得相當有趣。
不過時空交錯片種，好易出現劇情犯駁問題，就算經典嘅《回到未來》同《蝴蝶效應》都係。所以喺《變種特攻：未來同盟戰》，編劇都加入幾多論述式劇情，加上狼人見番靈鳥，同其他新舊人物嘅描述，卒之搞到成套戲講多過打。好彩戰鬥場面依舊精采，一班X-MEN五花八門嘅招式，的確睇到龍叔叔心花怒放。
至於BD表現，算係交足功課，好多幽暗場面嘅細緻位表現都好足，令天馬行空嘅CG場面，更添幾分真實感。某啲3D場面都表達到令人滿意嘅立體感，好多正邪兩派空群而出嘅場面，人物前後層次感勁正，拍到令人熱血沸騰嘅磅礡氣勢。音效方面，同上個禮拜隻《哥斯拉》一樣，採用DTS-HD.MA.7.1 48kHz收錄，高音同低頻不過不失，不過7.1環迴聲定位就有驚喜，喺某啲心靈對話嘅場面，或者一班人圍揪𠴱陣，聲音周圍走嘅效果都好過癮。
今次港版同時推出多個版本BD，包括跟前傳嘅合輯（$289）、鐵盒版（$269）、漫畫版（$289）同3D孖碟版（$249）等。本來龍叔叔對收藏鐵盒版冇乜癮，不過今次只比普通孖碟版貴十幾蚊，又儲得過喎！聽旺角DVD Pro店員講，鐵盒版的確比過往好賣。
港版同期仲推出咗湯告魯斯嘅《異空戰士》，一樣玩時空穿梭橋，但表達手法明顯高章同有趣，下周龍叔叔再詳談呢隻BD。
龍叔叔
簡介：幾十歲老宅男，聽歌煲碟打機無一不癡，一生最大成就便是家中收藏幾千隻碟，假日只愛潛伏家中煲碟，親情跟愛情也拋諸碟後。
