雖然港交所（388）行政總裁李小加仲有一年先至合約期滿，但市場已經傳出，港交所班董事唔想夜長夢多，準備叫小加續約3年；事關港交所成手新項目，好似早兩年以過百億元買落倫敦金屬交易所（LME），LME Clear又剛開始營運，仲有個滬港通等住開車㖭。樣樣都開咗個頭，𠵱家反而係小加有議價能力，可以吊高嚟賣就真。
港交所獨立非執董許照中都話，「𠵱家港交所好多計劃做緊，唔會無啦啦換人啩！」之不過，會唔會正正因為咁，李小加今次續約就變成「皇帝唔急太監急」，小加可以乘機扭計加多啲人工先肯簽紙續約呢？但小加𠵱家份人工已經好有份量，舊年計埋花紅同股份，袋走超過3,800萬元，同佢2010年初入港交所時比較，人工已經翻一番。