正當香港陷入史無前例嘅政治危機時，澳洲傳媒突然爆出特首梁振英涉貪。即係咁，於民望咁低之時，突然有白紙黑字嘅文件公諸於世，其實對廉政公署來講，係一個大好機會重建聲譽！
之前「湯顯明事件」搞到廉署聲譽低沉，今次如果能夠出手調查梁振英（即係佢老細）涉貪案，兼夾以極高調姿態示人，仲要出盡全力去查，一定令廉署挽回唔少民望。查老細，未死過？唔使怕啦，如果佢咁都唔落台，就係習近平冇面，睇佢條「特首命」都命不久矣。
話說多得梁振英，好多女仔成日挨夜去金鐘，搞到大家都話「唔使減肥」啦。瘦，對女仔來講真係好重要。近年碧生源（926）勁谷減肥茶業務，減肥茶work唔work？未飲過亦唔需要，所以唔考究。不過身為女人，我可以好肯定，只要有marketing，呢啲茶一定有客！
今年初開始，碧生源已執靚減肥茶包裝兼加價，提高格調，仲學人做真人show冠名贊助，令今年上半年價量齊升，減肥茶銷量升9.9%，銷售收入上升39.8%至1.83億元，貢獻總收入58%。
碧生源上半年仲扭虧為盈，錄得1,720萬元盈利。加上剛開拓電商渠道，呢方面相信未來都仲有增長空間，業績預期可以漸上軌道。碧生源股價噚日有突破，大陽燭大升近一成收市，仲要大成交，明顯有資金追啦，個圖咁靚，可以跟注！
Fifi
http://www.facebook.com/lovefrystock
本欄逢周二、四刊出