雷神停賽，呢晚好多隻由佢騎開之餐士馬換人，其中蔡廐雙雄「勁開心」及「信眼光」一併落入田泰安之手。結果呢位仁兄嚟個熱倒冷爆，「勁開心」成熱冇影，「信眼光」10倍卻一放到底，勝出第七場三班泥地1200米；同場大熱「愛的呼喚」初次跑泥地得個追字，不敵「信眼光」屈居亞軍，第三名係「金巴裡好」。
「愛的呼喚」眾所周知馬主係天王郭富城，此駒由上季中開始停滯不前，對上四場出擊全跑二、三名位置贏唔到，呢鋪轉去泥地搵突破，跑落又係第二，搞到專程入場打氣之城城在看台流出不開心的神情，敗興而回。佢另一匹愛駒同老友ChiLam合股之「愛將」因傷患嚴重剛退役，練馬師方嘉柏今晚諗住贏「愛的呼喚」幫佢沖喜吓，點知都係唔得，「愛的呼喚」鞍上人潘頓唔好得幾多，連場跑第二令馬迷失望！
「信眼光」馬主譚榮根說：「『信眼光』上場十分失運，漏閘和受阻，此馬的血統顯示跑泥地亦可，今仗果然在泥地贏馬。牠很忠心準繩，希望今季好運一點，多取頭馬。」