佔領運動令受影響地區擠塞不堪，不少人一路揸車一路媽媽聲，乃人之常情，例如左丁山在星期一十點鐘之前入咗西隧，由西隧至到中環中心停車場，平時頂多用七分鐘至十分鐘時間，呢日就用咗五十六分鐘，為之叫苦連天。平時遇上塞車唔係冇，但好似呢次咁嘅「曼谷式行車」，就係第一次，由西隧去上環、西營盤嘅朋友，更加係慢過曼谷式。
午飯後特登由環球大廈沿住遮打道行到去和記大廈，轉右過遮打公園行德輔道中到環球大廈，路上行人不多，汽車絕跡，示威者全無，真不知為何要封路，唔怪得吃飯時，貿易C猛咁埋怨警察製造緊張，不清場（佢指遮打道及德輔道中）。左丁山幾十年在中環未見過行路有咁好景，幾乎想玩吓自拍，站在遮打道中間影相，路上一架車都冇，又冇幾多個人在前面或後面，以高樓大廈為背景，機會難得噃。一啲即將結婚嘅情侶，如要拍攝有紀念價值嘅真景照片，呢輪最好「佔中」，在遮打道、德輔道中影結婚相，遲啲就冇機會嘅嘞！
餐飲R因佔領金鐘、銅鑼灣，令佢旗下嘅餐廳生意大跌，幾乎日日喊幾聲，傳來電郵話如果佔領運動唔close down，佢嘅生意可能會close down，此乃實情，並非誇張，但佢亦同意西報（唔記得邊張，因南華、金時、紐時、華爾街日日大篇幅報道佔領（Occupy），啲老外對香港嘅時事知識狂升幾百倍）所言，佔領人士係idealists（理想主義者），不是realists現實派，想說服佢地「同情」受影響嘅生意人，盞嘥口水。多得西報猛咁講，啲老外知道香港有一個17歲少年Joshua Wong（黃之鋒），覺得幾奇異，又好笑，習近平點解要為一個17歲男仔而頭痛？喺大陸將佢關起來就冇事嘅啦！正因如此，如香港特區政府強力鎮壓，會被西方世界所笑，下次習近平會見默克爾夫人嘅時候，人地係咁意關心問吓呢個細路，習近平都會覺得冇癮。與黃之鋒及學聯執委相比，佔中三子係老嘢，無新聞價值，煲大一位17歲，先至夠奇情曲折，引人入勝，故此在西方傳媒眼中，黃之鋒係一個symbol，一個logo，可以賣紙，其他人唔恨得咁多咯，何況在佢身上，亦充份凸顯香港之世代鴻溝（generational divide）呢！