一場提早開席嘅佔中「盛宴」，源於學聯同學民思潮9月底佔領政府總部嘅公民廣場；呢場被外國傳媒形容「雨傘革命」，更成功嘅係掀起一場公民覺醒運動。而喺呢場運動上，雖然冇人係領導者，但一班企喺最前線嘅年輕人，機智同膽識都好受各界賞識，其中學民思潮召集人、年僅17歲嘅黃之鋒，仲揮低三子同學聯，俾外媒力薦攞諾貝爾和平獎㖭！
美國《紐約太陽報》（The New York Sun）喺星期二有篇社論題為《A Nobel Prize for Hong Kong》，主要講及喺香港持續咗逾一周嘅「雨傘革命」，大讚示威者以和平手法，力促中國信守《中英聯合聲明》提及對香港嘅民主承諾。
社論最特別之處，係提到諾貝爾和平獎唔知有冇設最低年齡限制？點解咁問，因為佢哋大讚17歲嘅黃之鋒表現好出眾，願意為港人民主前程冒風險，走在最前線，仲問喺共產中國內嘅所謂大人，有邊個聰明得過呢位𡃁仔？認為佢應該獲頒諾貝爾和平獎！
《壹錘定音》噚日特別就此訪問之鋒，問佢對呢篇社論有乜感受？之鋒話喎，佢並唔係呢場運動嘅領袖，因為運動開始嘅時候，佢仍然被困於羈留室，發起運動嘅係全港市民至真，反建議諾貝爾獎頒畀喺前線受催淚彈襲擊嘅香港市民。
謠傳之鋒媽是《蘋果》副總
樹大招風，前日網上流傳之鋒媽媽喺《蘋果日報》任職副總編輯，之鋒回覆八方，指傳言無中生有，絕非事實，籲放料人唔好當香港市民白癡，高呼「唔好搞我啲屋企人」。而壹傳媒人事部亦指，之鋒媽媽並非壹傳媒集團員工。
李八方
mailto:[email protected]