美國有人專門模仿奧巴馬而殺出財路，做copycat也能搵到食，資本主義的世界真的很可愛。
這位模仿奧巴馬的朋友，天生一對兜風耳，剃了頭刮了鬍子，再把膚色弄深一點，居然就有九成相似。就這樣，「狐假虎威」，出巡賺錢。
山寨版奧巴馬通常會出現在公司的晚宴、婚禮或搞笑電影等等，大概是，主人家的壓軸神秘獻禮：「各位觀眾，街坊社團聯會晚宴請來，美國總統奧巴馬！掌聲！」
問題是，並非每個元首，都值得模仿；因為並非每個政治人物，都有晚宴願意邀請。例如，老老實實，誰人想請689呢？
誰的婚禮會如此重口味，在乳豬全體進場時，由司儀激動推介：「各位觀眾，我地有請呢位嘉賓，見證新人嘅幸福！689！﹗」
我會懷疑其實呢對新人係想離婚多過結婚。又或者，係想令賓客無晒胃口，慳番酒席。基本上只要689一出現，賓客都會高舉雙手包圍佢。
即使係喪禮，你都唔想見到689出現，佢會搶咗主人家嘅鋒頭，大家會走去同佢鞠躬同瞻仰佢臉容。
公司周年晚宴一請689上台，負責抽獎，台下起哄：「係咪抽保鮮紙同雨傘先？」
這真是很悲哀的現實，香港有哪一位政治人物，是值得模仿，而且有商業價值？人家美國總統克林頓退休後的一場演講，一票難求；有無人會願意花錢聽689演講？「貼錢買難受」？
長得和奧巴馬相似的人，希望人人認錯；長得像689的人，自己向大家認錯。對啊，扮689最有價值的地方，便是落區向市民認錯。問題是，真正的689只會躲在室內發表錄像講話，而且，永不認錯。那麼扮梁太如何？
可以，扮梁太，做家庭電器的代言人：「強力抽氣扇，保證倒抽一口涼氣。」