在這個整容如美容的年代，true beauty買少見少，也難怪大眾仍然膜拜保養得宜的美魔女。被奉為香港最後一位玉女的楊采妮，踏入四十不惑之年，去年圓了當導演的夢，又披了嫁衣成為人妻，揭開人生新頁，美麗神采隨之昇華；強調絕無退出影圈養尊處優之意的她，看透人生都是一場成長修練，年齡自然no big deal。
統籌：林妙萍
撰文及造型：趙潔恆
攝影：郭賢興
髮型：Sam Lo of Pi4.com.hk
化妝：Ling Chan @ZING the Makeup School
楊采妮對感情事一向低調，與新加坡籍男友邱韶智十幾年間經歷過分手又復合，去年終成眷屬。「我睇人生係我哋嚟到世界經歷唔同嘅事，靈性不斷成長，睇吓修行到邊個程度。我覺得結婚之後，就係有個伴同我一齊成長、互相支持 ，我覺得好開心。」
更似拍拖
婚後楊采妮與老公去了3個星期蜜月旅行，到墨西哥潛水放足假；定居新加坡的兩口子比拍拖時更如膠似漆。「拍拖時反而聚少離多，就算曾經一齊工作，但係當時我哋嘅狀態都好緊張，好workaholic嘅階段。𠵱家好少會分隔，有時佢出trip我都會跟埋去。仲多咗拍拖嘅感覺，一齊煮飯、去睇戲，有時我哋好簡單，每星期去搵個公園散步，好多情侶拍拖常做嘅事，我哋𠵱家先至成日做。」
眼見好姊妹梁詠琪有喜，有沒有觸動當媽媽的念頭呢？「我哋都有傾過生小朋友嘅話題，好多人嘅計劃都唔同，有好多人結婚係想生小朋友有個完整嘅家庭，我哋結婚係想兩個人喺一齊。如果上天安排我哋有小朋友，會好開心。如果上天覺得未係時候，我哋兩個人都會好好地enjoy家庭生活，生孩子真係一件好隨緣嘅事。」不急於生子的她坦言現在的婚姻狀態平淡舒服，也是最理想的。
回歸演戲
闊別銀幕兩年，楊采妮執導《聖誕玫瑰》後回歸演員崗位，在新片《一個人的武林》中演幹練督察查案捉犯，與甄子丹合作，不過武林高手當前楊采妮不敢班門弄斧，笑言用高科技好了。「今次都做好多功課，研究角色時會諗個人物嘅前傳係點，又去咗學開槍，因為有很多開槍嘅戲份。做過導演之後多咗同幕後人員做嘢嘅經驗，所以睇劇本之後，都會想了解多啲點解佢哋要咁做，再同導演傾，磨合出個角色。」
退出誤解
說到近年拍戲產量平均一年只有一部，是否部署淡出幕前甚至退出娛圈，就如當年為愛退出一樣，楊采妮急急澄清，「其實當年只係咁啱我公開有男友，而又同時去咗創業，令到好多人到𠵱家都以為我當時係為咗愛情而退出，如果係我嗰時就結埋婚喇。」清楚自己熱愛電影與創作的她，婚後仍然對事業抱有衝勁，希望做演員外亦都可以嘗試不同的幕後工作，「 再做唔做導演，或者幾時再做導演都好depends on有冇好劇本或者啱嘅題材。我好想創作啲關於人性嘅故事，結咗婚都好似打開咗片窗，可能都會成為之後嘅inspiration。」
無懼大齡
楊采妮踏入40歲，全不介意年齡數字，對於女士趨之若鶩的anti-aging有着另一番見解。「唔係話怕老，每個人都一定會老，呢個不變嘅定律。會有十幾歲時嘅青春，都會有一日變成婆婆。都調節咗與其去抗衡佢，不如好好地度過每個階段，每個階段都識得enjoy會好唔同，十幾歲你未必識enjoy某一啲嘢，但係原來到三十幾歲你就識得去appreciate某一啲嘢。我𠵱家會特別注重飲食，因為身體健康真係好重要，有幾多夢想財富都好，唔健康乜都做唔到。」這般從容豁達大抵是歲月儲備下來的睿智。
更多精采時尚內容，盡在 http://add.appledaily.com。