【雨傘革命】為爭普選的佔領運動今日踏入第12天，早前旺角的佔領行動中，因為有黑社會介入，引發暴力衝突，發生流血事件。事後警方當日的執法手法遭人詬病，也惹來警黑合作的傳聞。
昨日曾任職警察、江湖氣息濃厚、現年68歲的動作演員陳惠敏，以過來人身份拆解事件，並且用「啲人都熟口熟面」來形容當日出手的反佔中人士。昨日下午陳惠敏以贊助商身份出席在土瓜灣舉行的畫展，同場還有丁羽、吳思遠及肥媽瑪利亞。
「佔中冇影響生意」
陳惠敏甫出現就被追訪有關黑社會參與反佔中事件，他說：「我公司隻紅酒有份贊助呢個活動，所以嚟支持吓，佔中冇影響到我嘅生意。」問他對佔中的看法時，他說：「我哋老人家同後生仔諗法一定有分別，佔中係好嘅，但你唔好搞到平民區、新界區，你搞到人冇生意做就冇飯食。」他表示旺角跟金鐘及中環不同的地方，是有很多街邊檔口做生意，他續說：「呢啲檔口今日冇得做，聽日就冇得食㗎嘞。」
「我係做警察出身」
對於有指黑社會介入反佔中活動，並且使用暴力，年輕時曾當警察、也是江湖中人的陳惠敏想了一想說：「收到、知道，啲人（搞事者）都熟口熟面。冇辦法，好似砵蘭街、女人街呢啲幾千個檔口，冇陀地收，啲幫會冇飯食，你搞佢一個禮拜，佢哋冇飯食梗係出嚟搞事。不過你話警黑合作，我就覺得極冇可能。」
其間有記者問陳惠敏會否叫江湖友人對佔領人士出手輕點時，他只是笑而不語，並且轉話題說：「我係做警察出身，我覺得今次警察部做得非常非常之好，你睇吓同60年代暴動時好唔同，今次啲胡椒粉都係好低武力，唔可以話暴力，啲民眾圍差人兇佢哋都唔係咁好嘅。」
採訪：文國駿
攝影：陳慧安
