北京不斷搵五毛黨發放假消息，抹黑佔中人士，點知唔只有本地五毛，仲有疑似老外五毛為京賣命，針對民主黨創黨主席李柱銘同前政務司司長陳方安生大搞抹黑。八方追查之下，發現呢個老外五毛以智庫包裝，實際寫啲嘢錯漏百出，並唔可信。
話說內地網站同香港部份傳媒，引述一個聲稱係美國智庫「Land Destroyer」嘅研究員Tony Cartalucci寫嘅一篇以《香港「佔領中環」劇本在華盛頓寫就，領袖誤導基層》為題嘅報告，話馬丁同陳太訪美時，同美國國家民主基金會、美國國際民主研究院開會，「教路」可令北京對香港管治作讓步。
八方問過馬丁，佢好嬲話會面其實係座談會，上述內容全部老作，無中生有。八方查過Tony Cartalucci，原來呢個「美國智庫」基地喺泰國，之前佢寫過有一篇有關泰國紅衫軍報告，俾美國「行家」質疑佢啲嘢錯漏百出，為達到「結論」而扭曲資料、偏幫軍政府，完全唔可信，明顯呢件老外五毛水平太低。