正當香港人日夜瞓街爭取2017年真普選，美國已經講緊2016年可能有首位女總統喇！「股神」畢菲特日前飛去加州出席《財富》雜誌最有權力女性峯會，公開力撐前國務卿希拉莉喺2016年參選美國總統，仲話實跑出。
股神跟希拉莉素有交情，2008年已經撐佢參選。股神今次揚言：「我敢打賭希拉莉可以入主白宮，你知我唔係口輕輕」，佢估計，年近67歲嘅希拉莉會喺最後關頭宣佈參選，佢諗唔到有邊位比佢更有資格擔任總統，仲話可以用真金白銀同人打賭咁話。
希拉莉確係不停保持人氣，上月底佢千金生女，呢位外孫女即刻被人視為希拉莉明年宣佈參選總統嘅秘密武器；最近美國有套新劇《Madam Secretary（國務卿夫人）》，好多人都話係以希拉莉作為藍本，劇中嘅國務卿夫人經常展露溫婉一面，絕不強悍。