恒隆地產（101）董事總經理陳南祿喺恒隆4年有多，終於做到嘢，起碼請啱人管理租務部。佢舊年搵來太古A（019）舊同事陳家岳（Norman）過檔，Norman繼今年初搵到H&M租用銅鑼灣恒隆中心4層，市傳H&M可能租埋恒隆喺旺角嘅中低檔商場家樂坊，事成嘅話，成個場即刻升呢喇。
祿哥2010年中由太古過檔恒隆後，恒隆都走咗好多人，祿哥要重新組班底。
恒隆其中一瓣係租務，2011年底無厘頭請咗八達通前行政總裁陳碧華入去管租務同銷售，陳碧華喺八達通時，咪被人揭發公司將客戶個人資料外洩囉；不過陳碧華喺恒隆做咗一年多啲，舊年4月亦辭職走人。
舊同事陳家岳過檔
祿哥之後搵到太古舊同事Norman幫手。據聞，62歲嘅Norman喺租務界頗有地位，金鐘太古廣場開業25年，佢一早有份參與，又有負責北京三里屯太古里，早幾年去咗嘉里，祿哥叫到，佢先去恒隆。
Norman繼今年初成功搵到H&M租用銅鑼灣恒隆中心4層做全球旗艦店（預計明年下半年開業）後，聞說，恒隆𠵱家積極同對方傾緊，希望H&M租埋恒隆喺旺角家樂坊地下連地庫，加埋一樓共三層做旗艦店，傳聞月租近900萬元，傾得成就將目前100個舖頭仔趕走。
由於H&M喺旺角朗豪坊有一間分店，大家以為H&M份租約快到期，想由朗豪坊搬去家樂坊。
但H&M喺朗豪坊份租約原來去到2017年，換言之，朗豪坊老闆羅嘉瑞都唔使擔心住，即使H&M第日唔租朗豪坊，都仲有大把時間物色新租客。
李華華
mailto:[email protected]
