揀馬似乎係洋將專利，華將有馬揀，仲要揀到贏嗰隻，更加罕見。鄭雨滇今期挑通眼眉，騎開「至勝威龍」，今次走去騎泥地未贏過之「好老友」，結果畀佢搞掂，一早擺前走，贏出第三場三班泥地一哩，幫自己增添頭馬之餘，更幫埋老友葉楚航敲響今季夜馬勝鼓。「好老友」上季最後一仗初跑泥地即上名，今季先喺田草千二米熱身，呢勻跑番泥地一哩即爆11倍冷W，仲同「行政指令」包辦一條王牌馬Q，第三名係另一冷門「同友運」，熱門馬全部失蹤。
「好老友」練馬師葉楚航說：「賽前我研究對手，沒有太多快馬，預計步速慢，因此給鄭雨滇的策騎指示是擺前些少走，結果出現慢步速，馬兒佔優勢。今場對手並非很強，較強的『至勝威龍』排９檔不利。『好老友』外地贏過三場膠沙地，今戰泥地亦合，牠的性能廣泛，泥地及谷草皆宜，快活谷將開鑼，此馬又多一條出路。」
冠軍騎師潘頓唔知係咪受頭場搏輸「彩球」影響，跟住兩場騎熱門「樂有贏」、「好主意」都表現欠佳，單係W彩池已經輸咗七位數字。值得一提，羅理雅今晚開始客串，可惜賀廐「行政指令」12倍影相僅敗，賽後賀賢頭耷耷嘴歪歪，一臉失望。