作為一位有水平嘅媒體朋友，講嘢一定要有角度，但唔好扮有深度，直接中帶有少少深奧，係我做人嘅哲學，因為咁樣人哋先覺得你堅，太流就無人喜歡，係唔係？
市值勁過唔少主板股
以前成日講，創仔殼價值2億元，主板5億至6億元不等，殊不知一個互聯互通，將舊經濟嘅知識以創意性破壞嘅方法一嘢打散咗！
真係要多謝內地嘅資金，令我哋要不斷自我滅絕重新，為咗令大家支持我嘅見解，我做咗小小市場研究，例如圓美光電（8311）市值有40億元，華星控股（8237）市值有70幾億元，之前喺蘋果寫個隻滙財軟件（8018），市值都超過40億元，大隻過唔少主板！呢個現象令我哋睇到幾樣嘢。
一、殼價已經唔係一個重要指標，八仔公司市值漲大，有利日後公司喺資本市場上更得心應手，包括注入項目換取新股。
二、以前成日話創仔板係次一級（second best），互聯互通已經令我國愛炒賣嘅祖國粉絲炒炒炒！
三、上主板已經唔係一種光榮，以創仔板嘅貨乾加支太陽電筒照照佢令佢哋更有亮光！收唔收到先？
Prof J有個老友買咗圓美光電，跟晒我教嘅蜻蜓投資法去做，0.5元買兩個大洋走晒，極以為自己好威，殊不知乜嘢有能力轉主板，盈利夠就上主板呢啲廢話，都完全敵唔過一班內地粉絲包括所謂基金嘅炒賣念力，所以都係要做國企行，跑多啲大陸收多啲料先啱！
要數嘅股，多不勝數，先數住隻壹照明（8222），市值20億元，以理論計，跟住大圍炒應該都係right track決定要將呢個元素加入Prof J蜻蜓投資法，令到系統與時並進。
似乎10月尾開通之後，創仔板喪住炒應該係下一個新主題，記得留意！一徐定音，出擊！
徐燦傑
齊魯國際控股首席策略總監
本欄逢周四刊出