有啲藝人對政治冷感，亦有藝人好有熱血！日前曾經戴黃絲帶出席活動做司儀嘅葛民輝，據知都去過佔鐘現場，每次都成為佔鐘人士集郵對象，而佢一概冇say no；其中公民黨曾國豐日前亦喺佔鐘現場遇上阿葛，即刻拉住佢影相，佢話同阿葛閒談間得悉，對方唔止去過一次現場，認真有心！其實阿葛亦喺自己facebook貼上一張佔領現場嘅相，相中有標語寫住「警察哥哥姐姐，其實我哋都好愛你」以及「和平抗爭」，同時亦留言力撐學生。阿葛話香港人一向能屈能伸，但點解沙士亂世都捱得過，今日嘅市民反而咁脆弱？佢撐學生為更美好未來而發聲，「為何大人總愛把事情複雜化而愛拖延和逃避，要逼大家齊聲佔中乞求一個原本是一早說好了的真普選呢？」佢呼籲大人唔好孩子氣，一句「期待星期五，共勉之」，似乎對學聯同政府嘅對話有期望。