為咗搵銀，英超海外賽呢個計劃死灰復燃，有望喺5季之內落實。如果搞得掂，每隊每季至少多收500萬鎊（約6,200萬港元）。要搞咁大個改革，英超賽會當然想得到英足總嘅支持啦，所以仲建議加設歇冬期，等班英格蘭球員有得中途唞吓，等夏天幫國家隊踢大賽都精神啲！
每隊多收逾6,000萬
英超行政總裁史高達摩亞喺2008年提出過類似嘅方案，就係加設第39輪聯賽去海外踢，但俾球迷同傳媒插到飛起，所以隔咗咁多年先重提舊事。據英國《每日郵報》消息，新計劃唔使啲英超球隊踢多輪，或會改為喺現有38輪比賽入面，抽一輪到海外舉行。我求大俠心諗，英超梗係見到季前喺美國舉行嘅國際冠軍盃搞得好成功，曼聯對皇家馬德里場波有成超過10萬人入場，肯定流晒口水。
資助機票安撫球迷
有傳媒幫英超計過條數，如果計劃落實，每間球會至少袋多500萬鎊。雖然搞海外賽可以賺多啲，但肯定俾本土球迷批評，例如抽咗輪去外國，咁咪有10隊波少咗場主場比賽囉。英超就諗住確保一定數量嘅主場球迷可以去到海外捧場，做法不外乎資助機票之類。英國《每日鏡報》消息話，計劃最快喺16/17球季推行，但最大機會就喺19/20球季先開始。
除咗搵銀，據報英超賽會仲想推多項新政，就係加歇冬期。近年英格蘭國家隊成績越嚟越差，唔少人就怪英超冇歇冬期，搞到班球員冇得回氣，去到季尾已經殘晒，咁又點會踢得好大賽！不過，加歇冬期嘅建議需要英足總幫手配合，包括廢除英足盃嘅重賽制度，同埋英聯盃4強都要由兩回合變成一場定生死。雖然英超賽會發言人話未有以上計劃，但我求大俠相信，咁多傳媒爆料，肯定係英超高層向傳媒放風，試吓水溫。
識睇，一定係睇足英台【英波Live】：
http://soccer.appledaily.com
http://bit.ly/engballlive