建制派唔敢面對抗爭群眾，拒絕立法會噚日新會期復會，諷刺嘅卻係佢哋一邊話唔返立法會開會，一方面就約齊人腳去開會，但當然唔係喺俾黃絲帶圍住嘅立法會內聚頭，而係專登去酒店開房傾密偈！
其實上個星期五，佢哋已經去咗觀塘如心艾朗酒店開記招，當時因為臨急臨忙要搵地方開記者會，所以搵咗旅遊界姚思榮幫手，拿拿臨喺酒店搵位落腳，話開完會過東隧返港島區都好方便。至於噚日，佢哋則留守港島區，一朝早就喺天后維景酒店開房傾對付泛民密偈。據聞佢哋都唔想呢次酒店爆房事件曝光，見到有記者到場都好愕然，有人仲話要捉鬼㖭！但既然到此一遊咗，建制派開完會都好似自由行咁，攞出手機喺酒店外留倩影，唔少議員變身「機佬」，負責揸機幫大家影相。