講開朗豪坊，邱淑貞老公沈嘉偉旗下本地「潮牌」I.T（999）有幾個品牌租用朗豪坊，其中一個品牌Izzue租開嘅8,000呎大舖，被日本時裝品牌Uniqlo租咗，下月開張。
有趣嘅係，Izzue之前月租63萬元，Uniqlo嘅新租約只交41萬元，低35%。
大家唔好以為一定係業主冠君產業信託（2778）見市道唔好減租，事關商場舖，除咗底租，仲有營業額分成，即係租戶生意越多，就要交多啲租，不排除大業主係睇好Uniqlo嘅營業額勁過Izzue好多，先至用較平底租吸引對方。
需知道I.T舊年賺少27%，沈嘉偉早前仲話審慎看待開店策略，又話唔敢估前景，似乎唔多樂觀。