城市大學前管理科學系副教授曾淵滄噚日忽然通知各方好友，叫大家以後唔好再稱呼佢做城大教授，要改叫佢做「財經評論員」。查實曾淵滄早於舊年2月底已經離開城大，不過佢一直都冇叫人改口稱呼佢，相隔約一年半，佢話近日先至「突然諗起」自己冇教書好耐，於是就通知大家改口，佢強調，並唔係經人提醒叫佢改㗎。
曾淵滄喺城大教書廿幾年，幫敝報寫財經專欄都有近16年，累積咗好多粉絲，喺財經版嘅收視榜，長期高踞首十名之內。聽佢講，係退而不休，雖然冇教書，但𠵱家就有幫其他公司做顧問，主要係喺投資同埋做生意方面畀意見，不過佢就點都唔肯透露係乜嘢公司。除咗做顧問，佢都有幫一間創板公司上海交大慧谷（8205）做獨立非執董。