特區政府在上星期五（十月三日）發動全面宣傳，反擊佔中，警察、商務局、財政司司長輪流出場開記者會，指佔中對市民造成不便，帶來商業生意及經濟損失，明顯係大打民生牌，隨着佔中延續下去，呢類公關式宣傳，會愈來愈多，政府不用硬功攻堅，驅散示威人士，一於用軟功，爭取市民情緒壓佔中。
政府呢次宣傳，不止針對本地傳媒，呢次佔中運動已成為國際事件，奧巴馬親口向中國外交部長王毅提及，大量外國傳媒在港報導，國際紐約時報連日以一版至兩版報導，BBC與CNN幾乎日日將佔中新聞作為網頁頭條，甚至有現場直播，便可知英語世界嘅傳媒已將事情傳播到整個世界。美國著名文化刊物The Atlantic及New Yorker竟然亦會有專文講。可見已引起美國知識界嘅注視，不止有廣泛報導，而且內容明顯傾向同情示威群眾，大讚香港示威人士文明、有禮貌、夠清潔，主動清理示威現場垃圾係全世界其他地方未見過之事。
在國際傳媒、輿論幾乎一致同情之下，假如香港特區政府命令香港警察使用子彈、催淚彈去對付示威人士──當中以年輕學生為主──當然令到香港特區形象大大受損，料梁振英不敢冒天下之大不韙。故此咯喎，用軟功、用忍功、用群眾鬥群眾，拖垮佔中，乃係必然政策。呢次示威令人出乎意料不及嘅，乃係除咗本地大學生、中學生對梁政府之憎厭程度，以及外國留學生之踴躍參加，在金鐘隨街可見留英留美，英語流利到極嘅示威者接受外國傳媒訪問，呢批人應是比較有錢嘅富二代，特登由外國趕回來參加佔中嘅，佢地好可能同富裕父母意見不合㖭。大記者到街市買豬肉，肉販話兩個仔女（讀緊中學）一放學就丟低書包走咗去旺角參加佔領，唔肯到街市幫手，令佢好不滿！販夫走卒子弟如此，富家子弟亦如是，一起爭取民主反梁振英！林鄭月娥、袁國強、譚志源三位港大校友不妨反思一下，點解香港下一代學子咁鬼反對政府。佢三位受政府指派與學聯代表（即佢哋三位嘅師弟妹）談判，有乜好談呢？如何克服代溝呢？佢地在港大讀書時，正是認中關社後四人幫時期，幾有愛國情懷，或者會向啲九十後學生講一番歷史嚟kill time？