雨傘革命，令創意遍地開花，一張《寵物小精靈》小智「689出嚟啦」Poster，完全演繹「創作力量同幻想，會嚇你一跳」嘅神髓。不過，認真呀吓，如果「香港人」都係一隻寵物小精靈，以近期進化嘅速度，係未必會輸囉……（以下情節會以「比卡超」代表香港人，點解？因為開心啲）
喺呢一個寧靜公園，就係狼英同小智決鬥嘅地方。小智好心急，咩都唔諗就即刻召喚：「出嚟啦，比卡超！」鮮黃色嘅比卡超，外表由頭都尾，都係好可愛：「Pika!Pika!」（翻譯著：梁振英！下台！）
狼英都唔弱，高喊：「出嚟啦，689！」呢隻小精靈一睇就知前世係隻狼，仲要係隻戚眉戚眼嘅狼。小智望一望，「果然係一隻一世都未見過咁樣衰嘅小精靈，厲害呀吓！」狼英哈哈兩聲，「仲有更加佔唔到嘅嘢，689，進化啦！唔好等啦！」
Bling一聲，689肚腩處有個袋，「嘿嘿，驚呀呢！『袋住仙』，快啲出招逼佢袋。」
小智呢個時候，當然唔敢怠慢，「比卡超，唔好怕佢！使出『能屈能伸』嗰招啦！」
你要知道「比卡超」喺「李氏力場」下訓練多年，已經練成無論空間係好大，定係好細，都會住得開心，食得安心，只係供樓嗰下比較失落啫。你睇，長實（001）嵐山1期，最細單位177呎，當時全城嘩然，但竟然仲有人買；去到最新嵐山2期最細165呎，出面冇咩人討論，好明顯大家已見慣不怪！證明「比卡超」適應能力堅高！去到邊都瞓到！「瞓街呀！比卡超！」
果然呢招真係使得，嚇親狼英，仲搞到狼英發晒茅，決定將行動升級，「袋住仙，快啲將啲胡椒、花椒、黑椒、豉椒，咩椒都好，全力出招攻擊！」估佢唔到嘅係，佢竟然再拎多個精靈球出嚟，「出嚟啦，毒氣禿鷹！」
小智心諗「呢招果然狠毒！」比卡超呢個時候開始失去攻擊力，狂咳又狂喊，睇到個心都痛埋；而「袋住仙」同「毒氣禿鷹」乘勝追擊，係咁噴椒又噴氣。不過狼英似乎忘記一樣野，就係「比卡超」適應力，真係強到你唔信，佢竟然自行進化，進化到呢兩種毒物，兜面噴都唔怕！仲可以喺濃霧下擺Pose，上埋《時代雜誌》，真係好癲的生物。
「比卡超！機會嚟啦！」比卡超突然Bling一聲，佢又進化呀！鮮黃色嘅佢，竟然頭頂多咗把雨遮，咪住，點解佢個身反晒光嘅？嘩！係保鮮紙呀！係比「十大武器之首」－摺櫈，更勁嘅兵器保鮮紙呀！！！傳說中呢種叫做保鮮紙嘅武器，連生果刀都唔係佢對手，比卡超戰鬥力爆燈啦！
果然呢兩樣嘢一出，狼英開始歇斯底里！佢決定將所有精靈空群而出，當中最賤嘅一定係隻「分化武士」，而比卡超面對佢，竟然主動出「Unfriend」抵擋！小智見形勢不妙，「比卡超，唔好呀！Unfriend就中計啦！！進化啦！進化做『唱K比卡超』啦！」
比卡超一個轉身，就唱出百分貝：「Happy Birthday to You！Happy Birthday to You！」然後又唱埋MK Pop Song：「媽媽今年不必擔心我，終於知道世界是如何」、「風繼續吹，不肯遠離，心裡極渴望希望留下伴著妳。」「年輕得碰著誰亦能像威化般鬆脆…」
經過聲波攻擊後，狼英大部分精靈都成功被小智收伏，只係剩底「袋住仙」同埋「毒氣禿鷹」…
欲知後事如何，我要先留意事態發展。
by千頌C@堆填區
http://fb.com/winbigwok