風聲鶴唳草木皆兵，一定要打醒十二分精神，千萬不可誤信讒言──尤其是面書那個人多口雜的模擬街市，最多五花八門的流料，真真假假考起曹雪芹，否則關愛子民的國家不會辛辛苦苦在它周圍建起高牆，確保純良老百姓不受污染。譬如前天有個署名CY梁的戶口，女書生廣邀同好落club玩樂之餘，不忘炫耀老竇近排威水行徑，揚言爹哋以七嚿水日薪招聘打手搞亂檔，「香港呢勻你仲唔死」（能力所限，翻譯水皮，請見諒），一眼望落，毋庸出動福爾摩斯偵查，都可以斷定係老作。冇陰功，這些毫無憐香惜玉之心的幕後寫手太過份了，把趁佢病攞佢命的招式推向新高峰，為「有種的你就打我吖笨」火上添油，實在要不得啊。不過俗語說開卷有益，果然不是呃細路，我不但從七嘴八舌的回應之中，撈出「坑爹神女」這麼抵死的綽號，還第一次知道too young too simple原來音譯「圖樣圖森破」，接下來的sometimes naïve譯「上台拿衣服」，既大大增進了翻譯知識，也無端端得到練習純正普通話良機，一箭雙雕一石二鳥，誠人生快事也。
甚至，被網民鬧到仆街那個連鎖珠寶店女公關的墨寶，我也認為是好事之徒故意激嬲群眾的陰謀。唔該你用腦想想，在爆出集會女學生被暴徒非禮的風頭火勢時刻，群情洶湧千夫所指，怎會有人白痴到、賤格到公然發表幸災樂禍宣言，「非禮？記住唔好報警；革命要犧牲㗎啦，爭取民主大晒㗎，佢哋係『和平』嘅非禮！你哋體諒吓！」，末了還附送「笑到卡卡聲」符號？假的，假的，一定是假的！