重慶機電（2722）唔只注資concept，集團又食住呢期熱爆嘅長江經濟帶國策，喺嚟緊嘅日子，掂過碌蔗，重機係等發威。
重機嘅基地重慶，地段正正喺絲綢之路經濟帶，同長江經濟帶嘅戰略支點，地利佔優。後邊長江經濟帶有幾巴閉？呢個區域經濟發展，家陣已經提升到國家戰略層次，按意見，成條長江經濟帶將會發展到6億人口，估計去到2020年，區域嘅經濟規模，係會佔全國總經濟規模50%樓上。又就重慶市本身，亦都規劃到2020年，包括汽車、高端裝備、新材料等等產業，要實現總產值去到2.2萬億人仔！
估值較同業平七成
睇到係，重機核電、風電同水力發電呢啲瓣數，已經食住環保國策，而隨住長江經濟帶興建，加埋重慶市本身定位發展，對重機汽車設備、電力設備、通用機械，瓣瓣亦食到應，長搵長有。
又重機阿媽重慶機電集團，仲有包括呢期市場熱炒嘅軍工、通用航空同電子訊息瓣數，而阿媽家陣總資產值，亦講緊500億元，係重機總市值48億元10倍。重機仲講明，阿媽第時會向重機注入優質資產。諗到嘅係，重機家陣市值size，啃唔落太大型注資，亦即係話，重機要注資，市值有機會先要快高長大。呢期場內國企注資經典例子，有儀征化纖（1033），股價喺5月底停牌，到9月復牌，累升咗124%。
咪扯咁遠，專業評估，重機今、明年度EPS係0.163元同0.19元，明年度預測PE得6.8倍。場內近磅嘅上海電氣（2727）預測15倍PE、航天機電20倍，重機折讓咗近70%。煲重機，現價（1.29元）中線翻一番計數，預測PE 13倍幾，仲未追到上海電氣。
錢雋
細價股專家
本欄逢周二、三、五刊出