財演經常被人質疑，原因很簡單，「講就無敵，做就有心冇力」。無論講到天花龍鳳，又平又正，唔買對唔住自己，但被問到有沒有持有，十之八九都表示「冇貨係手」。散戶是個犯賤的動物，財演有貨推介，又話對方有利益衝突，想人接火捧；但無貨在手、齋出口術讚好，又嫌對方沒說服力。如果身家億億聲的財演推股，你又會唔會follow呢？
要數全港最富貴財演，獨立股評人David Webb一定有份。據港交所股權披露，這位股壇長毛手持13隻股份（股權逾5%），連同剛減持的鱷魚恤（122），市值接近8億元。身家8億的財演，基本上毋須靠推冧把而從中獲利，事關Webb自2010年後，已經宣佈不再提供聖誔禮物股。投資者唯一獲悉他買貨沽貨的途徑，就是他持股在港交所「被披露」。
每逢Webb買股消息曝光，翌日有關股份都出現相當大的升幅，筆者稱之為長毛效應。長毛效應的精髓，五個字講晒：貴精不貴多。坦白講，財演每日推介，其實是一件好痛苦的事，其實邊有咁多股票推介。講完真係升，有號召力的財演，深明遊戲規則，寧願間唔中醒隻畀你，好過日日推，營造矜貴好嘢的感覺。
Webb愛冷股 跟風要長揸
今年Webb有五隻股份持股超過5%要強迫曝光，翌日全線上漲，升得最少的滙星（1127）都進漲2%，8月下旬揸鱷魚恤（122）「被披露」，翌日抽高15%，最新順龍（361）持股重新增至逾5%，股價昨即扯高7%。Webb愛吼冷門股，很多都是沒有成交的死股，因此每次消息曝光，股價異動，其實是供求失衡的結果。瘦田無人耕，耕開有人爭，昔日股票每日最多百餘萬元交投，卻變成動輒千萬成交，散戶喪搶，造就股價飆升。
跟Webb搵食，要有長線作戰心態。統計由首次曝光入股價至現價，Webb 14隻持股，10升4跌，肯長揸可有逾倍升幅，但亦可能如愛高（328）輸一半唔止。跟唔跟富貴財演，自己決定吧！
王昇
https://www.facebook.com/stockwing1
版面調動關係，王昇暫代晉佳一天。