面對民眾自發佔領嘅雨傘運動，「古墓派」嘅狼班子高官，連日匿埋唔肯見人，但又成日動員唔少自己友出場反佔中，搬出唔少謬論挑機。有心人卻發現，原來狼班子幾位高官，包括狼英、卡片蘇同禿鷹嘅語言偽術金句，係可以用嚟反駁反佔中人士嘅質問㗎，噚日網上瘋傳《善用官場用語──公民抗命運動Q&A》嘅問答實錄，畀抗爭者攞住高官金句反挑機，既快捷、又方便！
阻人搵食要「包容」
其實反佔中人士，最鍾意鬧人阻住條路，搞到返工搭車排晒長龍，如果大家真係面對呢個質疑，商務及經濟發展局局長蘇錦樑就要「出動」咯，佢曾經喺回應自由行過多時話過：「可以等多班車」，呢個情況，一樣啫！若然被反佔中人士鬧阻住佢搵食，點忍呀？大家同樣可以用番卡片蘇金句：「包容係最好嘅處理方法」。嗱，卡片蘇叫得港人包容強國人周街大便；屎都忍得，搵唔到食，點解唔忍得？
佔領運動發展至此，撤退定留守成為爭議。如果反佔中人士質疑，既然政府肯同學生傾，點解仲唔撤呢？狼英想推國教科時一句「撤同唔撤之間係有好大嘅空間」一定K.O.對方。有人鬧佔中者喺馬路僭建路障又點好呢？多得狼英，大家知道「僭建處理咗，個僭建就唔存在」，真係好使好用！
喺呢啲「動亂」時刻，一哥曾偉雄點可以唔出動？所以當反佔中鬧佔中人士阻住人搵食冇良心時，係時候出動一哥抵擋「暴民」：「良心究竟係乜？你嘅良心同我嘅良心都唔一樣。」嘩！簡直係一針見血呀。
李八方
mailto:[email protected]