今季谷草賽事會否因佔中延遲舉行呢？有人話會，有人話唔會。馬華力覺得好大機會睇梁振英會唔會入場觀戰，如果佢出現於跑馬地馬場，咁就一定跑唔成。相反，如果佢肯顧全大局唔入場，相信學生集會不致於影響谷中賽事。
今期沙田夜賽莫雷拉停賽，影響大過佔中，起碼投注騎師王已冇咗扶手棍。就算唔買騎師王，亦冇咗亂局揸雷神做膽呢支歌仔唱，可能爆到九彩。
跑馬任你乜形勢，一樣有馬先過終點。既然冇咗莫雷拉，搵個鬥志一樣鮮明嘅羅理雅頂住先亦可。
羅理雅實力馬包括「天弓」，今季初出一仗因為排13位，被迫跟前跑影響後勁，今場有運抽番五位，容易搵到遮擋；上季跑第二嗰場，就係排四位起步。
羅理雅仲有匹「兵工闖」有機會贏馬，上季搏來搏去唔得，今季居然可一出即勝，情況跟廐侶「御皇鷹」差唔多，後駒已打叠兩W，唔排除「兵工闖」今季先大熟，可再度反彈。