由於快活谷有大型渠務工程，上季早於6月5日已上演谷草煞科戰，相隔四個多月後，話咁快本月19日谷草將重開上演日賽。但有人話近期「佔中」影響港島交通，擔心谷草開鑼戰能否如期上演，馬會暫時就話要觀望，但今日就喺跑馬地馬場舉行記招，為10月22、29日及11月12日三次周三谷草夜馬造勢，宣佈舉行大型「快活谷啤酒節」慶祝活動，希望打造成為城中盛事熱點。
「啤酒節」以德國為主題，馬會話屆時無論啤酒及食物種類、馬場佈置以至現場氣氛，都會令人仿如置身德國慕尼黑節日當中。所以記招特意請咗馬會德裔主廚Bruno Burg及中德混血名模貝安琪做嘉賓，由主廚Bruno Burg講解各款啤酒節美食，而貝安琪就率先體驗一系列德國啤酒及試玩遊戲。
除咗佢哋之外，馬會仲搵嚟一大班靚女model，扮成啤酒女郎，又有外籍美女穿上德國民族服裝，介紹家鄉啤酒種類；而經常幫馬會做節目嘅Jumbo曾淑雅亦有出現，Jumbo 22歲，係2011年中國小姐冠軍，由於佢身高174cm，腿長樣靚，即時搶去唔少風頭。仲有無綫《搵食飯團》節目三位主持陳國峰、李佳芯及溫家偉，亦有到場試食。