關於佔中都有單蝦碌料，話說位於中環娛樂行間hmv今年7月底完成翻新重開，原本計劃好晒，搵嚟一班歌星喺9月9日舉行開幕派對，但係當時市場開始盛傳佔中好快啟動。聞說，hmv老闆胡景邵（Kelvin）聽「知情人士」講，話佔中隨時嚟料，於是就好果斷咁取消咗呢個派對，點知佔中去到上周日先至正式啟動，搞到hmv𠵱家都唔知幾時先至搞番呢個開幕派對。
其實呢件事都唔怪得晒Kelvin，早兩個月大家日日講緊幾時「去飲」，佔中氣氛越來越濃，中環hmv喺正皇后大道中，Kelvin擔心佔中影響佢哋搞開幕派對，因而決定取消都無可厚非，佢都唔知道會信錯「消息人士」嘅流料嘅。hmv今年成立20年，佢可以諗吓將開幕同慶生一齊搞囉。