有「地獄廚神」稱號嘅Gordon Ramsay上個月喺中環蘭桂坊開咗間叫Bread Street Kitchen & Bar嘅餐廳，正式進軍亞洲。不過佢就似乎意猶未盡，想將旗下餐廳喺亞洲遍地開花。
早排Gordon就已經同拉斯維加斯金沙集團傾緊合作，仲拍咗板喺明年進軍新加坡金沙；澳門方面，似乎亦有眉目。澳門政府前兩日公佈嘅憲報顯示，Gordon已經註冊咗「Gordon Ramsay」同「Bread Street Kitchen」兩個商標，都係佢旗下餐廳品牌。
明年澳門陸陸續續有多間新賭場落成，好多賭場都想搵番幾間高檔食肆坐鎮，好似銀娛（027）嘅澳門銀河二期就已經搵咗「富豪飯堂」福臨門，仲有林建岳私人投資嘅意大利餐館8 1/2 Otto e Mezzo Bombana喇。