蘇施黃前晚捧黃子華的棟篤笑《唔黐線唔正常》，大讚子華表現出色，留言道：「黃子華，抵你laughing to the bank!!!! 要學習，學習！」她昨早更上載一張相片，笑指子華今次開騷的戰衣，竟然同人撞衫，她說：「弊！子華同人撞衫㖭！仲要條日本仔着住子華件登台衫喺東京行街街！」
此外，子華開騷一票難求，昨日網絡仍有大批網民在不同討論區跪求門票。
撰文：楠楠
【觀眾點睇】婆媳擬佔中最傳神
男神黃子華首場《唔黐線唔正常》前晚正式開騷，歷時三小時的棟篤笑，騷後觀眾無不拍案叫絕。
吳先生：
最鍾意佢開頭講佔中嗰度，好認同講得好中。佔中發生以來，都冇見過佢講過，想知佢點諗。冇諗到佢會用婆媳關係呢個比喻（中港關係） 。
鄭先生：
我係第一次睇黃子華棟篤笑，覺得真係好好睇，最深刻係佢開頭講佔中。講婆媳關係真係講得好好。
陳先生：
係子華嘅fans，佢嘅騷一向都有睇，覺得佢今日講得好精采，尤其係佔中嗰部份。中港用婆媳關係呢個形容真係好貼切。
阿恒：
覺得好好睇，最鍾意佢講狗嗰部份，講嘅話題好合乎現實發生嘅事。佢講佔中嘅嘢都好合乎主流。
