【今日我至Sweet】
勵志電影《爭氣》噚晚喺圓方戲院舉行首映禮，竟然吸引到金管局前總裁任志剛與太太葉小慧，仲有恒生銀行（011）一姐李慧敏與老公袁天凡齊現身，甜蜜蜜咁拍拖睇戲。不過一問到佔中，佢哋就即刻耍手擰頭，都說財經界多數人都避開唔講佔中㗎喇。
任總早前曾經警告，香港搞佔中嘅話，會令中央質疑香港作為國際金融中心嘅地位，𠵱家佔中啟動超過一星期，佢又點睇呢？點知華華一提，任總就話「唔講啦，唔講啦」，隨即拉住太太入場睇戲。
陪老婆睇戲嘅袁天凡原先都冇乜介心，好輕鬆咁話平時最鍾意睇《James Bond》、《Indiana Jones》呢類動作舊片，仲喺屋企翻睇過好多次。不過一講佔中，袁天凡就話要買嘢食，拖住老婆急急走人。「殼王」陳國強亦有現身，佢話「我成日都出席首映禮喇。」原來係常客！
