「其實都冇諗咁多，做咗先算。」投擲催淚彈後一天，有貨van司機自組義載隊，為港九新界市民義載物資到會場支持學生；有社區藝術家，24小時內將小故事寫成歌打氣；有學生航拍了幾天，把民運片段放上網，石屎森林中遍地星火，感動萬民。我們都是平凡的市民，但各自用自己的方法，撐起不同的雨傘，支撐學生運動。無論革命是否成功，佔領期間所發生的，經已很美麗。
記者：曾冠輝、陳慧敏
攝影：楊錦文、梁志永、劉永發
貨Van三子 無償運水送飯
谷到一臉暗瘡的阿迪總是笑笑口，9月30日一早來到，受不了：「啲學生乜物資都冇，成條乾屍咁瞓晒喺度，我就買咗7,000蚊遮、餅、蛋糕、水同退熱貼，用手推車跑咗廿幾轉車嚟。」遇上來往港九新界義載市民物資的宋子明，阿迪晴天霹靂地說：「早啲遇到佢哋就好啦！」辛苦都算，最慘是動用了與女友遊台的基金。銀包空空，他竟然很開心：「係呀𠵱家我全身得番70蚊咋！」那我請你吃飯？「唔使！附近餐廳好好，日日送飯嚟，我仲記得第一日有炒飯，第二日有燒味飯、兩餸飯同炒公仔麵。有日搬完貨轉頭有8盒pizza擺喺度，但係冇人喎！平均每日有150至200個飯盒，我哋送入會場，好神奇！」
「我哋6日冇開工，全力收物資，成班司機六、七十人平均冇咗差不多50萬收入。有個義載司機受訪之後甚至被炒魷魚，但係大家諗住件事過咗至算，唔理得咁多。」同行的張卓鋒平時睡8小時，這星期平均每天只睡3小時，召喚人之一宋子明只有兩天正常睡覺，其餘時間就在物資站整理東西。9月30日道路仍很亂，他們只能由愛丁堡廣場用手推車把物資推到政總。手推車重，跑一轉要25至30分鐘，跑了兩、三轉即雙腿痠軟。阿迪：「我哋都做到好殘喇，平時搬咁多貨，跑好多轉都冇事。30號𠴱晚喺物資站整理物資，個幾鐘頭已經攰到彎唔到腰，腳痛到爆。」
貨van司機都曾就送客送貨問題遊行，可惜沒效果，港人和政府懶理，張卓鋒亦變得政治冷感，但今次眼見警察向手無寸鐵的學生投催淚彈，很難受，「學生你都唔幫，我哋嘅未來就乜都冇。」近日市民捐贈物資數量大幅減少，場內卻有人浪費物資，宋子明更心痛，「飲咗兩啖水就丟、毛巾唔洗就丟、一個人貼幾塊退熱貼，好浪費。呢啲係市民心意，大家要珍惜。」
拉闊譜曲 題材多到寫唔晒
在金鐘留守至星期五清晨，打算歸家小睡數小時，到旺角找「革命中的廿四小時」。一覺醒來，警察、「愛字頭」和黑社會疑似連成一線，縱容暴力殺入旺角，「黑警年代」彷彿重臨。
「革命中的廿四小時」是由一班社區藝術工作者發起的行動，概念源自英國藝術家Pete Moser， 24小時坐在旺角街頭，收集途人分享的故事和感受，即時寫成歌，目標是每小時一首。結果？「最後做唔到，因為故事比想像中多，寫上感受同故事嘅memo紙貼滿牆上。呢幾天大家都太緊張，有太多感受冇機會思考、整理，而我哋重視故事多過能唔能夠達標。」Eric是其中一位發起行動的藝術工作者，「𠵱家發生嘅係一件歷史大事，如果冇好好將呢段時間嘅經歷同感受好好整理，記憶就會慢慢流失，最後可能淨係記得有件咁嘅事發生過。」
到寫稿此際，行動繼續，收集到的故事陸續被寫成歌，並上載到面書和YouTube，是種民間的歷史見證。「佔領區內大家守望相助、互相分享，即使有真普選都未必能達到。」Kiki 是另一位行動發起人：「寫歌可以畀人知道旺角其實發生咗好多好美麗嘅事，並唔係網上流傳嘅謠言所講咁烏煙瘴氣。」如果你有親身到過暴力入侵前的旺角集會現場，你應該會發現旺角是前所未有地和諧，大家平等、有秩序地在會場中央分享個人感受，市民可以舒服地在彌敦道上走動，人也變得有禮。你試過在旺角沒消費仍不斷聽到有人跟你說「唔該」和「多謝」嗎？如 Kiki 所言：「以前冇機會同呢個城市談戀愛，因為這場革命，我哋開始愛上呢個地方。」
廣告學生 讓世界看到星海
10月，留守金鐘的總是不時看到航拍遙控飛機在頭頂穿梭，大家還熱烈地向飛機揮手。21歲的陳卓越與李嘉霖，兩位廣告系學生，自17歲起每有社會事件，就執起相機竄到人群中做記錄。由9月30日到10月2日，他們晚晚在金鐘以鏡頭記錄所見所聞。9月29日，他們上載了3分鐘短片《航拍十萬人下的香港》，截至10月6日中午，已有96萬點擊率，許多外國媒體都向他要求轉載，讓全世界感動。
陳卓越：「其實都唔知會有咁大迴響，以前都拍過菜園村、新界東北同7．1等議題，但係都冇乜人睇。」最難忘是9月30日晚上，黑壓壓的人潮填滿了中環與金鐘。大樓中間的人舉着手機，如海浪般遍地星光。李嘉霖說：「大家都知現場有好多人，但係喺高空睇，先感覺到人多得誇張。天上望同地上望差太遠喇，真係好感動。」10月4日旺角暴徒出沒隔天、訪問過後，他們就執起相機跑到旺角人群裏，再一次，盡力記下一切。
革命中的廿四小時
http://www.facebook.com/24HoursInTheRevolution
《航拍十萬人下的香港》
http://m.facebook.com/story.php?story_fbid=10205037669248521&id=1446371185