今期賽事大摩馬房出馬唔多，其中第二場「菁英神采」乃首次上陣嘅自購新馬，大家對佢一定較陌生，呢匹馬其實早喺上季三月已經展開操練，一直唔出賽，無非等到今季更成熟，更有把握一出即勝，先至安排上陣。睇番佢本周一由羅理雅試草地，跳完返機坪大摩親自接馬好緊張，當時「菁英神采」好生猛，操完都仲咁精力充沛，反映狀態同體能狀況相當唔錯。
呢匹馬無論馬主團體及血統都有睇頭，團體成員包括前藝人傅明憲嘅年青男友莊家彬，係佢第一次養馬，而大劉紅顏知己呂麗君亦係馬主之一。
「菁英神采」嘅老竇「街頭口號」逝世冇耐，在港同父馬如「續領風騷」等每每能躋身高班，而阿媽服役時贏過四場級際賽咁多，舅父「燦惑」過去喺香港曾12捷，贏過經典一哩賽及百年紀念短途盃等大賽，咁嘅背景下，「菁英神采」插入四班，睇嚟多數係超班馬。