體操王子李寧嘅忠臣張志勇終於離開李寧（2331）。公司噚日宣佈，張志勇希望花更多時間處理私人事業同其他業務，即日辭任非執董。呢位老臣子1992年加盟李寧，雖然話佢早幾年將李寧推向低谷，走係遲早嘅事，不過，公司出張通告只得短短幾句「董事會尊重張先生決定」，感謝佢作出「寶貴貢獻」，都實在太過冷淡了罷。
張志勇算係李寧左右手，公司2004年上市以嚟，一直坐穩行政總裁職位。據講，李寧創辦人之一、中國動向（3818）主席陳義紅當年有份向李寧推薦，搵張志勇做接班人。可惜2008年京奧後，運動股泡沫爆破，但張志勇唔醒水不特止，仲力谷狂開店，希望打贏Nike成為中國一哥，結局係點大家都睇到。
2012年TPG入股後，張志勇做唔夠半年就「被引退」後，雖然仲係董事，但係已經好少公開露面，佢之後陸續減持李寧股票，至今套現超過7,000萬元，有錢傍身都好嘅。