早年打芒亨打到去麥記「集會」，今次直頭佔領旺角！講緊嘅，其實係由東京池袋「Monster Hunter 4 in Namja Town」移植過嚟、全港唯一的Pop-up Store，乘着新作《MH4G》於下星期正式推出，一眾遊戲商品更加率先發售集氣。店內大家仲可以手執1：1的「操蟲棍」拍照留念，想變身真正獵人，梗係要親身朝拜啦！
記者：陳國輝
攝影：楊錦文
芒亨系列一直廣受好評，而即將在本月推出的老任3DS版本《MH4G》，據說魔物更多達92款，是歷代之冠！雖然未有得玩，但代表角色如艾路（Airou）的最新造型鎖匙扣或魔物鐳射貼紙等，已經可以在Pop-up Store內搵到。同時，還有多款來自池袋Namja Town的別注商品越洋來港。各位芒亨粉絲記得把握時間，喺12月14日閉館之前嚟朝聖喇。
新作商品搶先發售
入到去，你可能會大聲話：「一眼望晒啦！」咁都冇辦法，位於朗豪坊9樓嘅NAMCO店，本身地方唔算好大，Pop-up Store更只係佔其中一部份，鬥面積，確實難與佔地過萬呎嘅池袋Namja Town相比。
但講到最新的《MH4G》精品種類，佢絕對唔會輸蝕！例如印上最新logo及獵人造型的T-shirt，就多達四款。另外仲有cap帽、水杯、手機鐳射貼紙及八達通card sticker等，應有盡有。但計我話，最吸引嘅仲係於《Monster Hunter 4》出現過的魔物Gore Magala模型，聽聞呢隻figure喺日本也極之缺貨，更何況香港？所以能否成功搶購，就要睇吓好唔好彩啦。
邊聽歌邊烤肉
店內產品當然唔止得《MH4G》一個版本，以遊戲角色Najavu及Airou為代表的Namja Town別注版精品，都由東京搬嚟香港！例如共有五款的原創手巾仔，就有多種趣怪可愛的Airou造型；另外只得三款的軟膠吊飾，萌度十足，非常切合女性粉絲需要。
但齋賣商品未免太過商業味濃，始終唔係辦法，Pop-up Store就特別提供歷代芒亨中的經典道具模型，包括在《MH4》首次登場、能不斷成長的操蟲棍；又可一邊聽歌、一邊轉動烤肉器，全部均以1：1還原，啱晒一眾粉絲嚟到試玩兼影相留念，如果着埋獵人套裝，豈不是更有親切感！
新貨到着
Monster Hunter 4 HK Pop-up Store
http://www.facebook.com/NamcoWonderPark