金鐘嘅佔領區域呢幾日氣氛明顯較之前緩和，八方連日都有落過去睇㗎，發現留守嘅市民都各有各活動，同時亦各自有一套自律嘅自發秩序，而且仲有好多得意輕鬆小事情。有網民就發現一封「尋人啓事」（圖），貼咗喺政府總部大閘。原來有一個小男生，尋找一名喺10月3日同佢一齊喺特首辦外抗爭嘅小女生，該名自稱「企在你身旁全身濕透白衫黑褲的男生」，明顯想搵返一直共患難嘅女孩子，真係夠晒溫馨！
八方睇完呢封感人信，除咗發現小男生手字差咗少少，仲有錯別字喎，呢位「企在你身旁全身濕透白衫黑褲男生」若要感動佳人相認，似乎寫字時都要再認真一啲嘞！