無綫甘草演員關菁（關達泉）上個月因為心臟病發離世，享年63歲。佢嘅喪禮會喺今日11點喺紅磡福澤殯儀館進行大殮，儀式過後，遺體將移往鑽石山火葬場火化。喺噚日嘅設靈儀式上，唔少曾經同關師傅合作過嘅演員都有送上花牌，好似有宣萱、歐陽震華同埋吳廷燁等。同佢合作過嘅魏駿傑、吳廷燁、駱應鈞同李添勝等，都有到場致祭。
慨嘆人生無常
聽講關師傅個心臟一向都麻麻，魏駿傑話：「係㗎，佢係喺手術途中離開，佢屋企人都知呢個手術係風險好高，當時都喺現場！」講到相處嘅點滴，佢話：「以前拍戲出外景，收工會去關師傅間房飲茶，阿嫂又會整定啲嘢食，我哋成日互窒對方，大家係好好朋友！」佢仲好慨嘆話：「人生無常，有幾多錢都冇用，最緊要係活得開心！我都有同阿嫂講，最緊要唔好亂諗嘢，好彩佢三個仔都出咗身，仲結埋婚㖭！」再問佢失去咗一個好朋友兼好演員，會唔會覺得可惜？佢就話：「我都睇清咗，後生嗰陣會呼天搶地，但係𠵱家唔同，有時喊都喊唔出，眼淚在心裏流！」
撰文：馮仁昭