晉佳有一位喺中資銀行返工嘅老友，同時又係一位熱血青年，經常喺社交網站抱不平，鬧政府，鬧中共，鬧到啪啪聲。佢前幾日就喺社交網站解釋，由於佢喺中資銀行返工，人工高、福利好又早收工，可以拎住份糧嚟抗爭，做自己喜歡嘅嘢，同時喺機構入面亦搵同事分享政治觀點，何樂而不為？
近期雨傘革命，暴露咗梁振英班子有幾咁醜惡，對付港人嘅手段幾咁卑劣，點可以唔發聲！不過作為一個買股票嘅香港人，要對付梁振英，罷買中資股呢啲手段絕對起唔到作用，寧願仿效上述嗰位朋友咁，一於發奮喺中資股身上贏錢，賺到錢留住條命，繼續做正義嘅事，就係其中一種正確態度！
如果要發奮喺中資股身上賺短錢，噚日就要衝入注資概念股。除咗中航科工（2357）破頂之外，中廣核美亞（1811）噚日勁升差唔多兩成。中廣核美亞呢隻核電字頭股，未來會陸續獲注資，目前就以燃氣業務為主，計埋超額認購權後，市盈率雖然升到23倍，但係市值只係100億元左右，大有想像空間，如果有調整都可以買番一注。
如果從基本因素去睇，可以留意吓吉利汽車（175）。吉利自從2010年升到爆錶之後，股價已經迷失足足接近五年，噚日收市價3.25元，同2009年11月股價差唔多。不過，過去五年，吉利年年有錢賺，仲有唔錯嘅現金流，令到今年6月底每股淨資產膨脹到2.42港元，計落市賬率1.34倍，即使扣除無形資產後嘅市賬率亦只得1.7倍，同2009年市賬率3至4倍比較，而家已非常低殘。扣除每股淨現金0.8元，年度化市盈率7.7倍，對於年年有錢賺、執行能力良好嘅自主品牌汽車股嚟講，認真抵玩。
市賬率低殘 醞釀突破
吉利2009至2013年盈利年年都升，係今年上半年下跌兩成差少少，主要由於近年嘅產品設計唔得。賣車嘅，架車老套核突係死罪。不過，吉利母公司收購富豪汽車之後，上市公司今年下半年亦將步入收成期，原因係吉利2014年下半年至2016年嘅大部份主打產品，開始由富豪汽車設計或聯手生產，預計吉利產品喺市場嘅競爭力會提升，業績好戲在後頭。照咁睇，吉利股價應該進入新升浪，成為晉佳長線best buy之一。
吉利財政狀況相當健全，今年6月底淨現金55億元人民幣，但仲發3億美元5.25厘優先票據，似有後着，聽聞市場對於票據反應相當不俗。
吉利今年4月到而家形成咗上升三角形，前幾日港股急跌佢都仲升緊，近兩日已經醞釀突破，半年內預計將挑戰4.5元，長線就可以博破頂，不設目標價。
晉佳
版面調動關係，晉佳暫代王昇一天。