佔中啟動超過一星期，有人報料話噚日晏晝兩點左右，喺中環香港會門外，見到財庫局局長陳家強、證監會主席唐家成與金管局總裁陳德霖三位財金巨頭密斟至少五分鐘，似係一齊食完晏仲未傾夠，唔通就佔中商討對策？還是滬港通真係開唔成，佢哋要傾點收科？
一早聽聞唐家成同陳家強都幾鍾意喺香港會食飯，雖然華華未能直擊三人對話，但就搵到唐家成，佢冇否認同陳德霖食晏，但就不斷強調呢餐飯冇預陳家強，佢哋只係喺香港會門外咁啱撞見，傾咗幾句就各自趕返寫字樓開工咁話。
至於傾乜，佢當然唔肯漏半點風聲喇，淨係話一有滬港通嘅消息就會盡快公佈。
佔中暫時亦唔使傾喎，因為之前已經講好應變計劃，最重要係市場運作暢順，好在暫時都冇乜問題，冇乜嘢趕住要傾。