意甲周日上演榜首「激」戰，祖雲達斯主場3:2險勝羅馬，本來輸贏小事，但應該公平裁決嘅球證，出示咗3張紅牌趕人出場，仲判咗3球值得商榷嘅12碼，而祖記奠勝嗰球，亦有越位之嫌。昔日假波溫床嘅意甲，得益者經常係祖記，呢場波好易令球迷覺得，意甲根本一直咁黑暗！
場面火爆 3紅、3球12碼
祖記同羅馬開季都5戰全勝，今仗賽前已被視為冠軍前哨戰，火藥味在所難免。呢個時候，球證好關鍵，如果場上執法夠公正同冷靜，球員嘅情緒就會平和啲，偏偏呢位洛基球證淨係識火上加油，係就係吹得果斷，最弊次次有爭議。首先，佢喺27分鐘吹咗排人牆嘅馬爾干禁區內用手擋走派路嘅罰球，但慢鏡睇番就似波打手，結果祖記憑泰維斯射入12碼開紀錄；而球證仲將喺場邊投訴嘅羅馬教練魯迪加西亞驅逐上看台，你話羅馬球員點會唔嬲？
艾基利認球證執法麻麻
羅馬之後亦靠托迪射入12碼扳平，而完半場前1分鐘，再靠伊度比將比數反超前，但偏偏半場未完又出事，保羅普巴引球推入禁區之際被踢跌，明顯勾腳位係禁區外，但洛基就照吹12碼，結果泰維斯射成2:2；而換邊後，祖記靠邦路斯禁區外射入奠勝球，隊友維達爾當時企喺越位位置，影響咗龍門視線，旁證又好似冇察覺咁。完場前，羅馬嘅文奴拿斯同祖記前鋒艾華路莫拉達互抽，結果兩人當然紅牌被逐。
魯迪加西亞賽後狂插洛基嘅執法，仲暗串祖記球場禁區特別大，所以特別多12碼，連祖記教練艾基利亦認同執法水準麻麻。唉，睇完場波，我求大俠轉去新聞台睇吓𠵱家香港佔中運動嘅情況，又係同一道理，執法者高高在上，以為有權就可以隻手遮天，但呢個世界有公義，就算呢刻奈你唔何，歷史都會作一個公平嘅審判。
識睇，一定係睇足英台【英波Live】：
http://soccer.appledaily.com
http://bit.ly/engballlive