好多馬主養馬，只係想拉頭馬兼贏錢名利雙收，唔一定真正愛馬，但女馬主博愛醫院前總理葉思貝就唔同，佢當愛駒好似仔女咁，一個月梗有幾次去馬房探班，最鍾意同花名「小白」嘅「劍飛聲」玩錫錫，貝貝話「小白」有冇馬贏冇所謂，只想佢健健康康，隻馬一有唔妥，就搞到貝貝瞓唔着喎！
其實唔難理解貝貝點解咁錫「小白」，呢匹馬性格好乖巧，有個大白鼻，生得靚仔又可愛，而且戰鬥力十足，唔係得個樣，上季攞到三冠三亞一季佳績，累積獎金已經有257萬。
禮拜三晚「劍飛聲」將會休後復出，雖然隻馬今季未曾上陣熱身，但睇番佢上季正係一出即勝，係一匹蓄銳特佳馬，而且「劍飛聲」曾兩次角逐同程泥地1200米，一次三班跑第一，另一次二班亦只不過輸短頭入Q，今次降番落三班上陣，對手弱咗好多，睇嚟跑完之後，貝貝又會同小白玩錫錫喇！