唔少公務員噚日喺佔鐘情況下如常返工，有熱心市民自發煲咗靚湯接公務員收工。潘太、楊小姐同何小姐，噚日放工時間帶咗一大煲粟米紅蘿蔔清補涼，同埋幾百朵象徵希望嘅太陽菊去政總出口，派湯同花畀公務員。潘太話呢味湯除咗清熱，仲好潤㖭！
雖然大部份公務員都唔領情，湯同花都拒收，但喺發展局做資訊科技嘅合約工李先生一見到靚湯，二話不說拎杯嚟飲，仲話覺得好窩心，話佔領嘅市民開路之後，唔覺得返、放工好受阻。
至於商經局常秘黃灝玄同公務員事務局常秘黃鴻超，噚晚孖公仔返政總時都唔飲湯，黃灝玄一味笑笑話「冇嘢講」，旅遊事務專員容偉雄就話返、放工「大致正常」。