狼英有幾狠？睇吓佢參選特首期間，點樣用黑材料砌低對手唐唐就知！所以當坊間傳出，狼英支持以強硬手法，包括橡膠子彈甚至真槍對付示威者，好多人都信狼英做得出。為免學生受傷，好多人紛紛開腔勸佢哋早點歸去。當中最矚目嘅梗係兩位法律界德高望重人士，終審法院前首席法官李國能同最高法院前首席法官楊鐵樑，竟然都罕有開聲。八方聽聞兩官肯出動，同前律政司司長黃仁龍有關！
查實李官同楊官，過往都好少就政治問題發言，事關身份上似乎唔多適合。但喺前日，收山好耐嘅兩官打破慣例，罕有同日發聲明，語調一致呼籲學生撤離佔領現場，唔少政界中人都覺得，世事點會有咁多「咁蹺」呢？
「特首都有得佢做」
八方明查暗訪，果然有人幕後做嘢請師父出山。據知前律政司司長黃仁龍，都對佔中局勢憂心忡忡，好驚學生會成為狼英胡作非為嘅犧牲品，連日都有同泛民聯絡，希望可以化解危機，但堅持唔出名要低調。最後就由佢出招，叫師傅李國能幫幫忙勸學生撤離，愛徒開到聲，加上都愛護學生心切，李官當然義不容辭。佢同時叫埋同佢份量十足嘅楊官雙劍合璧，泛民笑稱黃仁龍呢次勸退有功，特首都有得佢做。
李八方
mailto:[email protected]