佔中遍地開花之後，越嚟越多原本踩佔中嘅人，唔覺唔覺咁都走埋去撐佔中。好似之前係咁踩佔中「×做」嘅熱血公民同黃毓民，前日就落戶去旺角「主持大局」，毓民仲走埋金鐘，叫人過海去聲援旺角，但據知咁樣辣㷫咗喺佔鐘現場嘅民主黨總幹事林卓廷，事關當日民主黨支持佔中，畀毓民係咁鬧、又話佔中冇用，𠵱家見毓民突然上身撐佔中，最終同毓民嘈起嚟。
呢個時候，連工黨郭紹傑都忍唔住毓民抽水，公開用大聲公狂片毓民，雙方又再大戰。查實又唔怪得郭紹傑咁嬲，泛民由絕食、毅行到佔中，佢單單撐盡，毓民卻單單踩盡；𠵱家毓民扮冇嘢搞佔中，郭紹傑唔㷫就奇！