上季方嘉柏消耗唔少兵力，成為冠軍練馬師，好多人因此睇淡佢今季嘅成績，又有唔少人話今季初冇谷草賽事，少咗個主場，亦會令方仔陷於苦戰，結果呢班人全部跌晒眼鏡，今季開波冇耐，方仔已經跑出有10 Win帶頭。沙田夜馬尤其厲害，兩次都有進賬，單係9月24日，一晚憑「豪逸」、「勁綵」、「快快贏」及「自動導航」四捷威到盡，話佢係黑夜之神真係唔過份。
好嘞，今期沙田夜賽方仔嘅馬又點呢？梗係有份量啦！尤其「飛天龍駒」，季內已熱身兩仗，呢朝(6日)出操後方仔mark到佢實一實，做咗跟得先生，跟住隻馬入倉，對一匹五班馬咁重視，當然有佢嘅道理。睇番「飛天龍駒」贏過五場，屬於罕見嘅五班多捷馬，經常受低估下爆冷Win，上仗跑1000米直路賽唔夠快，但末段追勢都好勁吓，後上第六輸唔遠，睇得出狀態已跑起，今次1400米啱追得多，又係黑夜之神方仔攞威嘅時候喇！